Lytse Pier en de flok fan it berneiepenloftmuseum - 2024

BIS 2024

BIS spilet dit jier ‘Lytse Pier en de flok fan it berneiepenloftmuseum’ dat is in bewurking fan de film ’A Night At A Museum’. De besikers wurde yn dit ferhaal meinaam nei it Berneiepenloftmuseum yn Fuottenein. In museum fol karakters dy’t wat betsjutten hawwe foar de Fryske kultuer, mar........ der is wat mei dat Berneiepenloftmuseum. It is in museum dêr’t, sa gau’t de klokke middernacht slacht, de museumstikken ta libben komme. De museumstikken dy’t oerdeis keurich op harren fuotstik stean, mar yn ‘e nacht harren âlde rom en ear herinnerje. En se komme net allinne ta libben, se wolle der út om yn ‘e wrâld fan 2024 ek harren rol te spyljen, de rike Fryske kultuer dêr’t se diel fan útmeitsje te ferdedigjen tsjin alles wat dy kultuer bedriigje wol! Hoe kin dat, dat se nachts ta libben komme? Dat komt om’t der in flok oer dat museum hinget. Der hat hiel, hiel lang lyn in famke west, dat te lang yn har ferline hingjen bleaun is en dêrtroch rûn it net goed mei har ôf: se drûge hielendal út en is úteinlik troch har doarpsgenoaten by it Berneiepenloftmuseum ynlevere, want dêr hiene se noch wol plak foar in útdrûge famke....

Museumstikken dy’t nachts ta libben komme. Spannend! Mar doocht dat wol? Heare wy net allegearre te sliepen nachts? Lykas Lytse Pier, in hiel gewoan jonkje, dy’t al sa min sliept, want syn heit draait altiten fierstente lûde muzyk..... Lytse Pier dy’t der in bytsje útrint by jim yn ‘e klasse.... O ja, elkenien ken in Lytse Pier... De besikers sille mei al dy nijsgjirrige Fryske kultuerfigueren yn ‘e kunde komme. Dat wurdt hiel learsum. It wurdt ek hiel dwaas en bespotlik. En faaks sille de museumstikken in bytsje help krije moatte fan lytse Pier om yn te sjen, dat je wolris in kear in nachtsje de saak op stelten sette kinne - mar dat wy allegearre úteinlik it gelokkichst wêze sille, as wy oerdeis de sinne op ús skine litte - en de nacht brûke om goed by te sliepen fan al dy moaie, fleurige, fertrietlike, stomme en bysûndere dingen dy’t we yn it libben meimeitsje - as wy oerdeis de eagen goed iepen ha.